Nisadas - Writer

Ranatunge Jayawardene 2 years ago 291 0 0

දෙවෙනි වීම

දින දසුනෙ
පෙන්නුවේ
දින දෙකක්
ගත වෙලා
අපේ පොඩි
ආරවුල
දැන් ටිකක්
ලොකු වෙලා
***
වැඩට ගොස්
ආවාද?
මොනව හරි
කෑවාද?
තනිව
ඉන්නා නිසා
පාලුවෙන්
ඇති නේද?
***
සුදු පුතා
මා එක්ක
කියවද්දී
ඔබ ගැනම
හඬනවා
හිතු ඇතුලෙ
නොපෙන්නුව
ගුණ ධර්ම
***
"තාත්තට
වැඩ පුතේ
ගෙදර නෑ
මේ ටිකේ
තව චුට්ටි
දවසකින්
ඇවිත් අපි
එක්ක යයි "
***
ටිකක් දොස්
කීවාට
වේගයක්
නෑ හිතේ
දුක හිතුනෙ
මට එදා
ඔයා කී
බොරු නිසා
***
ගොඩ ගහපු
හීන කඳු
අපි මතම
නාය ගොස් ...
අපි හදපු
සිත් බැම්ම
ඉරි තලා
හෙලවිලා...
***
ලබන
ඉරිදා උදේ
එනවනේ
නොවැරදී
මම ඉන්නෙ
ඔබ නිසා
දන්නවනෙ,
'මෝඩයෝ ..'
--------------------------------------------------
රනේ/26මැයි2024/දෙවෙනි වීම

Ranatunge Jayawardene 2 years ago 257 0 1

පසුබැස්ම

පොතකට බර වූ දෑසයි
වෙහෙසට පත්වූ පෑනයි
දැන් හොඳටම දැක පුරුදුයි
මෙහි වූ දුක සැප නොහැඟෙයි
***
මඩ කඩිති මංපෙත් දිගේ
ඈ නිතර දිව යනු පෙනේ
පැටවු සමගම හැම පැයේ
කථාවෙන් ඇති බව දැනේ
***
උදෑසන හිරු එලියයි
තඹරු මැද පිණි බිඳුවයි
මටම හරියන හැටියැයි
දන්නෙ තව, මං විතරයි
***
විටෙක ඇස් කොන් වලිනුත්
විටෙක මඳහස පාමින්
මදෙස හෙලනා කැල්මන්
යමක් පවසයි රහසින්
***
සිනා මුහුනෙන් මා දෙස
බලනු ඇති දැයි රිසියෙන්
නිතර ඔබ මොබ සරනා
මටත් වෙන වැඩ නෑ දැන්
***
අහන්නට සිත කීවත්
පිළිවදන් ගැන සැකයෙන්
මුවින් නොබැනම සිටියේ
එය ද මිහිරක් වීමෙන්
***
උනන්දුව වැඩි වුව ත්
'වචනෙ' වියදම් නොකරයි
දිනෙන් දින ගත වී ගොස්
දකින්නට ඈ නෑ දැන්
***
විපරිමින් මා බැලු වේ
නිවාඩුව කට ගොස් වත්?
අහෝ අසරණ වුනි මා !
සිප් හලේ ඈ නෑ මෙන්
***
ගමේ වැල වව්ලන්ටයි
පිටින් ආ වුන් කවුරුද ?
මිදිත් ඇඹුල ම බව දැන
බිසෝටම හිත දෙමි දන්
----------------------------------------------
රනේ/22මැයි2024/පසුබැස්ම

Ranatunge Jayawardene 2 years ago 200 0 0

අඳුර මකනවා

හුලඟ හමනවා
අඳුර ගලනවා
හෝ හෝ ගාගෙන
වැ ස් ස වහිනවා
//
වැස්සි තෙමෙනවා
පැටිය හඬනවා
කෝ කෝ ගාගෙන
කිකිලි දුවනවා
//
ගස් ඇඹරෙනවා
කූඩු කැඩෙනවා
ටිං ටිං සද්දෙට
ලේන හඬනවා
//
මිදුල පිරෙනවා
වතුර ගලනවා
හෝ හඬ දීගෙන
ගලා හැලෙනවා
//
කුඹුරු පිරෙනවා
පාර වැහෙනවා
දෙගොඩ තලාගෙන
ගඟ උතුරනවා
//
විදුලි කොටනවා
හෙන පුපුරනවා
නිං දෙන් ඇහැරී
නං ගි හඬනවා
//
අමිම දූවනවා
මුට්ටි හොයනවා
වහලෙ හිල් වලින්
ගෙපැල තෙමෙනවා
//
අකුරු කරනවා
ඉගෙන ගන්නවා
කවදක හරි මේ
අඳුර මකනවා.
_____________________
රනේ/14අප්‍රේ2020/
අඳුර මකනවා

Ranatunge Jayawardene 2 years ago 251 1 2

හොරකම

සත්තමයි ඒ
මම කලේ ..
මමයි ඒ
හොරකම කලේ ..
මමයි ඒ
සැලසුම් කලේ ..
මගෙ හිතයි
මා යොමු කලේ ..
***
කල්තියා
සැලසුම් හදා ..
හැම තැනම
ඔත්තුව බලා ..
යනෙන තැන් ටික
කොපි කළා මම
දින දසුනෙ
සටහන් තබා ..
***
දන්නෙ කවුරුද ?
බැලුව මේ මම ..
කැමති මොනවද ?,
ඉන්නෙ කොහොමද ?,
කන්නෙ මොනවද ?,
සෙව්ව, මේ මම ..
***
දින ගනන් මම
ගත කලා ..
සති ගණන් රෑ
නිදිවරා ..
වෙන හොරුන්ටත්
ඉඟි කලා මම,
හොරකමක්
සැලසුම් කලා ..
***
වෙස් වලාගෙන
කල්තියා ..
නුහුරු මිතුරන්
හැර දමා ..
ඔබ යනෙන මඟ
නිති පතා මම,
හොර හිතින්
පියමන් කලා ..
***
ඇත්තමයි ඔබ
අහුවුනා..!
මගේ හොරකම
හරිගියා..!
ඔබ නොදුන් ඒ
සොඳුරු හදවත,
මම හොරෙන්
හොරකම් කලා ..!
----------------------------------------------
රනේ/19මැයි2024/හොරකම

Ranatunge Jayawardene 2 years ago 291 0 0

පරතරය

මහාර්ග පෙලපත,
වතු උයන්, මණ්ඩප,
ඇතු අසුන්
දැසි දස්සන් ඈ මෙන් ම;
තුරු ලතා ගොමු
දිය පොකුණු හා
අමා රස පලවැල
සමඟින්
***
රන් රිදී, සළු පිළි
මිරිවැඩි සඟල්
සහ
තවත් සහසක් දේ ..
උපතින්ම උරුමව ඇති
මා සිත්ගත්
පුරාවුතක් බඳු
නුඹ වෙත; ...
***
කිසිවකුත්
උපතින්
හිමි නොවුනු,
සිහිනෙන් පවා
රදල සිරිතක
නොගැටුනු,
අසරණ,
කුරා කුහුඹු මිනිසා
මම වෙමි...
නුඹට සිත දන්දුන් ..
දුටු වනම
ඒක පාර්ශවිකව ..
ඒක මතිකව..
---------------------------------------------
රනේ/15මැයි2024/පරතරය

Ranatunge Jayawardene 2 years ago 267 0 1

විද්‍යාව

පහන් සිල දැල්ලිලා
දැල්ල ලස්සන වෙලා,
එළිය මගෙ හද පුරා
විහිදුවයි පෝ දිනේ..
***
සමිඳු පා මුල මෙමා
පහන් වැට දල්වලා
ජනිත වූ ලෝකයේ
සතට සෙත පතන්නේ
***
තිර කඩෙහි අගට ආ
තෙල් බිඳෙහි දැවෙන්නේ
අඳුරු ඵල හැර දැමු
කර්ම දැයි මට සිතේ.
------------------------------------------
රනේ/29අප්‍රේ2024/විද්‍යාව

Ranatunge Jayawardene 2 years ago 215 0 0

වැටහීම

රජවෙලා.. රජ වෙලා..
අවනඩුව රජ වෙලා..
හැම තැනම, හැම විටම
ඇත්තමයි.. සත්තමයි..
***
පාසලේ, කම්හලේ,
ගොවිබිමේ, මහ මගේ,
බස් එකෙත්, මැති සබෙත්,
ඇත්තමයි.. කොයි තැනත් ..
***
දුක් විඳියි නිති පතා
අසරණයි සත සැමා
බිය කරුයි අප වටා
සැදන මේ බැමි හැමා
***
විය යුතුයි අපි මෙදා
නැවත ඒ 'මිනිස්සු' න්
වෙන්නෙ ඔබ අපි සැමා
සත්‍ය ඒ මිනිස්සුන් !
---------------------------------------------
රනේ/18අප්‍රේ2024/ වැටහීම

Ranatunge Jayawardene 2 years ago 292 0 0

දෙගුරු

ප්‍රේමිය ගෙන විත්
මා ඇස ගස්වා
ඉඟි බිඟි රැඟුමෙන්
ඈ හා වැයුමෙන්
***
මන් මත් කරමින්
රාග තාලයට
මන ඉඩ දුන්දා...
මංගල ස්වරයෙන්
***
කය හා ගැටුමෙන්
අවසන් වී ඇති
ප්‍රත්‍යය නුඹ වෙයි!
පියකරු පුත ඔබ...
***
අතහැර දැම්මත්
අමතක කෙරුවත්
වෙන' තක තැබුවත්
ඈතක යැව්වත්..
***
අප, හැර නොගියේ,
වෙන් වී නොගියේ..
සසර පුරාවට
නුඹ, අප පසු පස..
අපි, නුඹ පසුපස.
-----------------------------------------
රනේ/07අප්‍රේ2024/දෙගුරු

Ranatunge Jayawardene 2 years ago 330 1 0

බලු කම

අනේ බලු රාලේ
මාස් මාළු නැති වේලේ
අපිට බැරි කාලේ
ඒක කාටත් දැනෙනවානේ
***
ඇලේ පැන නාපං
අහුවෙන දෙයක් කාපං
බලු කෑම දීපං
කියා බොරුවට බුරල බෑ බං
***
යාළුවෙක් දුටු විට
ගොරොවා නොගොස් එදෙසට
මස් ලේ නැති කට්ට
දීල දාපං තලු මරන්නට
***
ගෙඩි කඩන් කෑවට
ලිඳකින් වතුර බීවට
හෙවනට එන උන්ට
බුරා ගෙන යනු බෑය මතුවට
***
වසරෙ දින ඔක්කොම
නිවාඩුව වත් නොගෙන ම
වැඩ කරන දවසෙ ම
කෑම පමණයි එකම ඉල්ලුම
***
අපි කරන සේවේ
කිසි ඇගැයුමක් නෑනේ
වැටුප් නැති වේලේ
නිකං බලපන් උන්ට බෑනේ
***
කුල මල ජාති ආගම්
ගැලපෙන පයිරු පාසම්
පාට කළු සුදු නම්
කොහොම ගලපමු බල්ලො වීනම්
***
වල්ගේ ඇද වූව ද
කකුල් හතරක් වූව ද
බුර බුර නොකීව ද
උන් ණයයි නුඹ නොදැන සිටියද ?
***
යන යන තැන අපට 'රජ සැප' ලැබීයන්
වෙනදා වගේ පාරෙදි මුන ගැහීයන්
හිතවත් මිතුරු කම හැමදා රැඳීයන්
'බල්ලා' යන්න වෙන අයෙකුට නොදීයන්
--------------------------------------------------
රනේ/04අප්‍රේ2024/ බලුකම

Ranatunge Jayawardene 2 years ago 227 0 0

විසඳීම

ක්‍රම දෙකයි;
එක්කො
ඔය කරුමෙම
කරගහගෙන
පැටලි පැටලි
එකම කරුම ගොඩේ
දිගටම යන එක,
නැත්නම්
ඔක්කොම
අතෑරල දාල
සැනසිල්ලෙ
ඉන්න එක,
මොකද කියන්නෙ?
-----------------------------------------
රනේ/31මාර්2024/ විසඳීම

Ranatunge Jayawardene 2 years ago 323 1 0

අභියෝගය

මාව එපාලු !
මොකද මන්ද ඒ ?
හොඳයි මම නො එන්න,
ඒ ගොල්ලෝ
දෙමාපියො ද...?
නිකම්ම නිකම්
කසිකබල් ජෝඩු!.
---------------------------------------------------
රනේ/30මාර්තු2024/අභියෝගය

Ranatunge Jayawardene 2 years ago 208 0 1

කම (කර්මය)

ගෙල බැඳි වියගස
දරමින අදිමින
ගෙවමිය ඇති දුර
යා යුතු බව දැන
*****
රිදවයි කෙවෙටිය
ඇනෙනා තුනටිය
නමමින මා දන
අදිමිය මේ රිය
*****
සක එයි පසු පස
බර රැඳි ගැල ගෙන
රැය මෙන් දහවල
යමි යා යුතු දුර
*****
රිය, සක ගෙවෙ තී
වියගහ දිර තී
මා කුර රැඳි තී
බර අඩු කෙරෙ තී
*****
රැස් නොම කරමී
තව බඩු ගැලෙ හී
මග නොම රැඳෙ මී
ඇද නිම කර මී.
----------------------------
රනේ/08/09/2021
කම(කර්මය)

71 Total Nisadas Found